SH MOHAMED IDIRIS ILA TALI: NINKEYGA SALAAD MA TUKADO MANA RABO IN ISKA FURO WAYO WAA JECLAHAY.

asc sheikh aduun iyo aakhiro Allah haku barakeeyo xasanaad aan lasoo kobikarin allah ku siiyo, waxaan ahay gabar guri leh, Pagekaaga ku xiran wax badan ka faa'iidaysata, wiilka aan is guursaney ayaa yurub i keenay, muddo sannad ka yar ayaan hadda joogaa, sheikh zawjkeega dhan kasto wuu ku fiicanyahay, qarabo xariirinta iyo qarabo takuleenta aad buu ugu fiican yahey aniga iima xuma laakin tan murugada iyo dhibatada igu heysato ayaa ah salaada Ilahey ma dukado walow 1 waqti xitaa markasto waxaan iraaahda duko ok uun buu iyaraahdaa aniga Allan ubarye salaatuleel inta soo koco Alla u tuuga markasto hadane waxaa iheeysto wal wal iyo xasiloooni la aan marka qaar waa iska ooya walhi waxaa dareema in aan dabi galayo ama anigii aan qeeb kaga jiro danbigiisi waxaan is dhaha armaad tahay tii jidka Allle kusoo ridi laheed ,sheikh marabo in aan furiin ka dalbado waan jeclahay ninkeyga laakin culees baa i heysto mana hurdo mana dagani farxad ma heeysto oo Ale ila ogyahe guriga baraka la'aan ayann ka dareemaa, caruurna isuma dhalin, sheikh ila tali iina soo duecey ilahey danbiga ha dhaafo.
_________________________________________
JAWAABTA SH MOHAMED IDIRIS XAFIDAHULAAH
Gabadhaas waxaan Leeyahay: Walaal ilaahay hakuu gargaaro, Zawjkaagana Allaha soo hanuuniyo, Waa arrin dhib badan marka qof aad jeceshahay aad aragto inuu xarigga ilaahay qabsan waayo, adiguna hanuunka qalbigiisa ma gelin kartid, Horay ayaa Eebe noogu sheegay aayadda macneheedu yahay (Cid aad jeceshahay ma hanuunin kartid, laakiin Ilaahay ayaa ciduu doono hanuunsha)..

Salaaddu waa laf dhabarta diinta, qofkaan salaad lahaynna diin ma leh, haduu sidaa ku dhintana xaalkiisu halis weyn ayuu ku jiraa, sida aayadaha iyo axaadiistu sheegayaan, Salaadu waa xiriirka Ilaahay kaala dhexeeya, qofka ka tagaana waa qof Xiriirkii Ilaahay gooyey, Qof xiriirkii Ilaahay gooyeyna waxba kuma noola..

Marka u horreysa Ilaahay ayaan kuu baryeynaa inuu soo hanuunsho, oo uu salaadda tukado, salaaddu waa calaamadda lagu kala saaro gaal iyo muslim qofkii ka tagaana waa gooloobey sida xadiisku sheegay.. laakiin gaalnimadaas ayaa culimadu laba tafsiir geliyeen: 1) Gaalnimadii weynayd ee islaamka looga baxayey iney tahay 2) Iney gaalnima yar tahay oo dembi weyn oo kabaa'iru dunuub ah.. 
Labada midkey noqotaba xukunkiisa islaamka waa in la maxkamadeeyo tuko la yiraahdo, haduu tukanwaayana xadkiisu waa dil maxkamadda islaamka.. Ma gaalnimuu markaa ku dhintay mise Islaam? waa Laysku hayaa..
Haddii lagu qaado tafsiirka hore macnaha gaal inuu yahay, waxaa ka ratibmaya inaanu gabar muslima qabi karin, oo si automatic ahba ay uga furantahay aaneyna isu dhiibi karin, isagana la dhaxli karin isna wax dhaxli karin, haduu dhintana aan lagu tukan, lana kafnin, lana aasin, qubuurta muslimiintana aan lagu aasin.. Sidaas saxaabadii qaar ka mid ah, iyo muxadisiinta iyo Imaam Axmed iyo Culima badan, casrigaanna sh. Bin Baz iyo Ibnu Cutheymiin sidaas ayey qabaan..
Sida Kale inaanu gaalkii weynaa ahayn, laakiin dembi weyn la yimi maxkamada islaam hadey jirtana la xabbiso haduu tukan waayana la dilo, Culimada kale ayaa qabta..aakhirana arrinkiisu ilaahay u yaal haduu tawxiid lahaa, inuu cadaabo iyo inuu u dembi dhaafo..
Mas'alada salaaddu horta waa sidaas oo lama fududaysan karo..

isla mar ahaantaas waxaan kugula talinayaa inaad adiga iyo dadka kaleba u naseexaysaan, kulana dadaashaan inuu tukado, una sabirtid intii karaankaaga ah lacalla inuu ilaahay gacantaada kusoo hanuunsho, hadiise naftu kugu dhibto, isna tukan waayo, markaas aad isaga tagto, si aan diintaadu ugu biloobin, gaar ahaan haddaan caruuri jirin, arrintu wey ka fududahay, sabirkaasna waa lacalla inuu ilaahay soo hanuunsho, laakiin xaq ayaad u leedahay haddaba inaad ka tagto qof Ilaahay u sujuudi waayey..

Ilaahay arrinkaaga ha sahlo, Tawfiiqdana haku waafajiyo, wiilkanna allaha soo hanuunsho, aamiin.