SH MOHAMED IDIRIS ILA TALI: MAALINTI HADII AAN MURUGEYSNEEN HABEENKI AYAAN MURUGO LA SEEXDAA.

Shekhow kheyr Alaha ku siyo. Waxan ahay wiil dhalin yar o 21sano jir ah wagi an yara waxan aha ilma yar o dhib badan quran ka akhrintisana an lagu kari jirin, xoga maadigana wan ku ficnan jiray. 

Malin ayan macalin kaygi la murmay isago igaracaya ana waxan dhahayey naga dayso ushada odayahow lakin wax gacana ama cey ah uma gaysan marki u ushi igala qustay ardaydina u sidayey ayu igula dardar may in waxa u igu dilayo u yahay quranka faa'idane ay ugu jidho aniga wuxu igula dardar may kalmad ana ilawin o ah in hadi an quranka ka car cararo o aan inta an yarahay ka fa idaysan aan maalin maal maha ka mid ah ka shalayi doono.

malinti wixi ka dan beyey quranki wan ka baxay hadalki macalin kaygina dhag jalaq uma siin, malinti wixi ka danbeyey waxa i helay fahmad xumo, xita maadigi an dhiganayey wan si wadan kari wayey, wana ka baxay, shalaygi iyo qamumyadi ayaan hada daremay.

waxan ad ujeclahay quranka waxan ad ujeclahy kutubta blse fahmad yari aya i heshay waxana igu dhacday niyad jab iyo murugo hadi anan malinti murugaysnen habenki ayan murugo mel lasexda, dhalin yaradi lodkayga ahed dugsi sare way dhameyen quran kane dhowr jer ayay nakhtimeen, aniga se murug ti adunka ugu xumed ayan mel kula dhacay xita mar mar waxan gaara inan naftayda wax yelo ugesto blse waxa i hortimada cadabka Alle iyo cabsida akhriro markastana muslinimada aya iceliso marki an damco inan naftayda wax ugesto.

hada waxan jeclahay inan noqdo xafidul quran iyo inan noqdo nin diinta aqon uleh markastana niyad jab aya i hortagan shekhow waligay arimahayga cid kalama tashan adiga mahane waxana donaya inad ila taliso ina duceyso..
JAWAABTA SH MOHAMED IDIRIS XAFIDAHULAAH
==========================

Adeer Waad ku mahadsantahay inaad ila wadaagtey arrinka ku haysta, Ducadana waan kuu hormarinayaa: Ilaahay Fahmadda hakuu siyaadsho, Qur'aankana hakuu fududeeyo, Xaafidul Qur'aan Allaha kaa dhigo, cilmi iyo camal wanaagsan allaha ku siiyo, aamiin..

Intaa Ka dib, Adeer nin fahmad wanaagsan inaad tahay qoraalkaaga ayaanba ka dareemay, waxa ku haysta waa xoogaa markii aad kuftay ayaad u malaysay inaadan kici karin, taasina dhab maaha..

Waxaad ogaaneysaa Cadawgeenna ugu weyn Adeer waa wel welka aan dhabta ahayn ee sheeydaanku innagu beero si uu innoo murug geliyo, waxaana daawa u ah inaan ilaahay u cararno oo difaaciisa galno واما ينزغنك من الشيطان نزغ فاستعذ بالله انه هو السميع العليم intaasaana ku filan waayo sheydaanku waa daciif ان كيد الشيطان كان ضعيفا .

laakiin haddaan u jabno, oo u fariisanno wuu innagu fariisanayaa.. Xoogga ugu weyn adeer oo aan haysanno waa niyadda iyo go'aanka, iminkadan niyadda geli inaad page cusub bilaabeyso, hana biqin inaad kufto, waxaad u diyaarsataa oo naftaada ugu sheekaysaa hadaan xitaa fashilmo mar kale ilaa boqol goor ka badan ayaan diyaar u ahay inaan ku noqdo ilaa aan ka sal gaaro, waana hubanti inaad target ka gaareyso ama ka badineyso..

Nolosho Adeer waa tartan فاستبقوا الخيرات cidina kaama mudna inaad kuwa ugu horreeya noqoto, waxaa kaa xiga oo keliya laba rakco inaad tukato, gacmahana kor u taagto: Ilaahow Kitaabkaaga iyo Kalaamkaaga ii fudaydi inaan laabtayda ku weeleeyo! horana u dhaqaaq.. barnaamij dejiso.. maalinkii saacad ka mid ah, subax ama galab: 5 aayadood ama 10 ama 1 page xifdi, ku cel celi, dugsi isku qor, macalin kaa dhegeysta la fariiso, salaaddana ku tuko wixii aad xafiday, 6 bilood ka dib hadii aad nooshahay waxaad arki is bedel weyn..

Miyaad ka tabar yartahay, ama ka fahmad liidataa, oday cajami ah oo aan arkay isagoo 70 jir ah qur'aanka inuu bilaabo oo xifdiyo raba, galab kastana macalinka u iman jirey.. Miyuu kaaga culusyahay wiilka maraykanka ah oo weligiis aan qur'aan iyo carabi arag, oo Qur'aanka maalin walba u fariistay saacad ilaa uu ka xifdiyey! miyaad ka tabar yartahay Habarta 65 jirtey oo bilawday dugsiga iney qur'aanka xifdiso, 8 sano ka dibna Qur'aanka dhamaysay!!

Qofku wuxuu qof ku yahay waa niyadda iyo Go'aanka, Ilaahay kaalmayso, murugtana daawadeedu waa dikriga ilaahay oo qalbigu ku dego, ee tasbiixda iyo istiqfaarta badso, waxaad arki adigoo mar kale dhashay, inshallaahu..

Ugu dambayn qisadaada wexey mar kale waano u tahay arday kasta in macalinka waanadiisa fiican la qaato, macalinku waa waalid, waa midka aqoonta innagoo yar yar innagu shuba, aan qaddarino hadalkiisa iyo dardaarankiisa..

Ilaahay Adeer adiga iyo dhalinta kaleba khayrka iyo fahmadda ha u furo.. Ha quusan, hana wel welin, Muslim ayaad tahay, oo sharaf kuugu filan!